على حسب مامرني ومن تجارب الأولين
الشاعر: عبد الله علوش
—————
على حسب مـا مرني ومن تجـارب الأوليـن
وجهة نظر ويجوز فيها الإتفاق والإنقسام
إترك مسـافـة كـــافية بينـك وبيـن الآخريـن
بعض البشر ودك حدود المعرفة معهم سلام
إصمت ولاتحرص على كثرالكلام الصمت زين
اللي سكـوتـه ســاتره يمكـن يعريـه الكـلام
وإذا تكلمــت إحـذر تكــون أطــول المتكلميــن
الســالفة لا طولت يضعف مـعاهـا الإهتمــام
وإمزح ومزحٍ باللسـان أخيـر من مـزح اليديـن
مـزح الرجــال العــاقلـة علـى حدود الإحتـرام
وإضحك ولاتضحك برفع الصوت رفع الصوت شين
من الأدب والذوق عند الضحك ضحكٍ بإبتسـام
وأكــرم وبيبــان الكـرم واجــد ولا يحتــاج ديـن
وترى الرجـال إكرامها مـاهوب في كثر الطعـام
وإحلـم ولا تعجـل ولا تغضـب ولا تشري بديـن
وشــاور ولـو رأيـك معـك لا شرت عداك الملام
وإذا شريـت بديـن لاتبطـي علـى المتجمليـن
كـلٍ حلالـــه غــاليٍ عنـده لو إنـه مــا يســام
ولاجاك مديونك معه بعض الوفى وبعضه لحين
فأستد باللي جــاك وش دراك لله الدوام
وترى التغــافـل فيـه لـذة وإنشد المتغــافليـن
وإن جات كلمة توجع أطلقها مع سرب الحمام
وإرضى ليا جاك الرضى لو العذر ماهو سمين
وترى التسـامح ميزة السـادة رفيعين المقـام
وصـادق وإذا صـادقت مـاجربت ماصـادقت لين
إمـا يطـول بك السهـر وإلا يطيـب لـك المنـام
وإصدق مع نفسك وتلقى نفسك من الصادقين
والنفس خيل إبليس لا تعطيـه نفسك واللجـام
وإذا نصحـت إنصـح خفـى لا تفضحـه فالحـاضرين
ترى الرجــال يقودهـا لين الحكـي قـود الخطـام
ولا تواضــع فـي حضــور العــالـم المتكبريـن
تكلـم بنفـس الطريقـة معهـم ونفـس النظــام
وأخلاقـك وتواضعـك عـامل بهـا المتواضعيـن
ونصـف الأدب مجـاملـة جـامـل ولا تجـامل لئــام
وإذا تسـولــف عن طمـوحــاتـك مـع المتفرغيــن
كنـك تسـولـف للنصــارى عن حـلال وعن حـرام
والعمـر مـا هـو فـرصـةٍ وحـدة ولا هـو بفرصتيــن
مع كل مطلـع شمس لـك فرصـة وخطـوة للأمــام
هـذا ولازلـنــا تـعـلـمـنــا الليـــالي والسـنـيــن
والعلـــم أخيـر من الجهــل والنــور جـلاي الظـلام
ــــــــــــــــــــــــــــ
اقرأ أيضا: من أقوال الشيخ محمد الغزالي عن الحياة
